Cynllunio Taith Gerdded

Cynllunio’r Daith
Mae’r llwybr oddeutu 135 milltir /218 km o hyd. “Milltiroedd ar fap” ydy’r rhain a dydyn nhw ddim yn ystyried y ffaith eich bod yn cerdded i fyny ac i lawr elltydd. Mae’r llwybr wedi ei rannu’n 25 prif ddarn sy’n weddol fyr. I weld y manylion, edrychwch ar dudalen Y Llwybr. Gyda’r wybodaeth yma, dylech allu cynllunio taith gerdded o 10 i 15 diwrnod.

Gwarbacio

Fel arfer nid oes caniatâd i chi wersylla’n wyllt yng Nghymru. Ar hyn o bryd, mae’r cyfleusterau ar gyfer gwersylla ar hyd y llwybr yn gyfyngedig.

Teithio’n Ysgafn

Mae nifer rhesymol dda o fusnesau Gwely a Brecwast, Tai Llety, Gwestyau a Hostelau ar hyd y llwybr. Dylai unigolion a grwpiau bychain allu dod o hyd i lety addas naill ai ar y llwybr neu yn rhywle cyfagos. Bydd darparwyr fel arfer yn dod i’ch nôl o’r llwybr am ffi, ac yn eich cymryd yn ôl yno’r bore wedyn. Yr unig fwyd y mae angen i chi ei gario yw cinio pecyn a diod.

Dylech sicrhau:

• Bod eich dillad o ansawdd da. Dylech gario dillad gwrth-ddŵr a’u gwisgo fel bo raid. Mae pâr da o esgidiau’n hanfodol
• Dylai eich sach gefn gael gorchudd neu leinin gwrth-ddŵr. Dylech gario dillad sbâr mewn bagiau tenau ysgafn. Dylai’r rhain fod mewn bagiau gwrth-ddŵr hefyd. Dylai sach gefn sy’n dal oddeutu 40 litr fod yn ddigonol. Cofiwch, os dewiswch fag mwy, dydych chi ond yn mynd i gario mwy o bethau gyda chi!
• Bydd busnesau Gwely a Brecwast, Tai Llety a Gwestyau’n darparu dillad gwely a thywelion wrth gwrs. Bydd hostelau a thai bynciau’n darparu sachau cysgu a thywelion am gost fel arfer.
• Mae ein darparwyr partner yn cynnig cefnogaeth a gwasanaeth trosglwyddo bagiau.

Defnyddiau ymolchi
Y “rheol aur” yw cario dim ond y lleiafswm angenrheidiol, bar bychan o sebon mewn cynhwysydd plastig, brwsh dannedd a phâst dannedd, rasel, diaroglydd, hancesi papur ac ati. Yn yr haf byddwch angen hufen haul cryf a hylif ymlid pryfed.

Cit Cymorth Cyntaf
Dylech bob amser gario cit cymorth cyntaf bychan mewn bag gwrth-ddŵr. Dylai hwn gynnwys y pethau nesaf yma ac unrhyw beth arall yr ydych ei angen: tabledi lladd poen megis parasetamol ac ibuprofen; plasteri ar gyfer toriadau a chrafiadau bach; detholiad bach o orchuddion di-haint ar gyfer anafiadau; clytiau antiseptig, plyciwr a siswrn.

Pasbort y Pererin
Gallwch gael pasbort i gofio eich taith gerdded. Mae’r manylion ar dudalen wahanol.

Cofnod y Pererin
Cofnodwch dystiolaeth o’ch pererindod drwy lofnodi Ffolder Cofnod y Pererin. Mae manylion am hyn ar y dudalen Newyddion (29.06.16)